ဂျူး ရဲ့ အချစ်ဆိုတာ ကြိုးနဲ့သီဖို့မလိုတဲ့ ပန်းပွင့်လေးတွေ


ဇာတ်လမ်းအဓိကမဟုတ်သော ၀တ္တုတစ်ပုဒ်လို သူနှင့်ကျွန်မချစ်ခဲ့ကြပါသည်။

ကျွန်မတို့မှာ အဖြစ်အပျက်တွေ ကြုံကြိုက်မှုတွေ ရှိသည်။ သို့သော် ဘာပြီးရင် ဘာလာရမည် ဟူသော ဖြစ်စဉ်များမရှိပါ။ ကျွန်မတို့မှာ ဆန္ဒတွေရှိသည်။သို့သော် မျှော်လင့်ချက်မရှိပါ။ ကျွန်မတို့ မှာ မှန်းဆကြည်နုးမှုတွေ ရှိသည်။သို့သော် အနာဂတ် မရှိပါ။

ကျွန်မနှင့် သူ၏အချစ်သည် မွှေးပျံသော၊လှပသော စံပယ်ပန်းများ ဖြစ်သည်ဆိုလျှင် လက်ထဲမှာ ထွေးဆုပ်
ထားသော ပန်းများပဲ ဖြစ်မည်။ စံပယ်ကုံးတစ်ကုံး မဟုတ်ခဲ့၊ကျွန်မတို့၏အချစ်ကို သီရန်ကြိုးမရှိခဲ့။

သို့သော် ကျွန်မသူ့ကို အလွန်ချစ်ပါသည်။

*****************************************************************

အာရုံငါးပါးတွင် အချစ်သည် အနည်းဆုံးတစ်ပါးပါးဖြင့် စတင်တတ်သည်ဟု ပြောပါသည်။ ကျွန်မဘယ်အာရုံဖြင့် စချစ်ခဲ့မိသလဲ ဟု စဉ်းစားကြည့်လျှင် ကျွန်မအံ့သြစွာ ရယ်ချင်ပါသည်။ အဆင်း၊ရနံ့၊ အရသာ၊ အသံနှင့် ထိတွေ့မှု အာရုံငါးပါးလုံးဖြင့် စချစ်ခဲ့မိသောကြောင့် ဖြစ်ပါသည်။


ချစ်သူတစ်ယောက်ကို ဘယ်အချိန်က စချစ်သွားမှန်းမသိဘူး ဆိုတဲ့သူတွေ တော်တော်ညံ့တာပဲဟု ကျွန်မထင်ပါသည်။ သည်လောက် အရေးကြီးသည့် အပြောင်းအလဲတစ်ခုကို သူတို့ ဘာကြောင့် သတိမထားမိကြတာလဲ၊ဘ၀မှာ အမြဲအောက်မေ့အမှတ်ရစရာ ကူးပြောင်းမှုတစ်ခုကို လူတိုင်း သတိရနေသင့်သည် ထင်ပါသည်။


ကျွန်မအတွက်က အချစ်သည် နှင်းတို့ဖြင့် မှုန်ရီသော နံနက်ခင်းတစ်ခုက သယ်ဆောင်လို့ ပါလာသောအရာ ဖြစ်ခဲ့ပါသည်။

အဲသည်ကောင်လေးတစ်ယောက်ကို ကျွန်မတို့ရပ်ကွက်ထဲကဟု သိနေတာဖြင့် ခြောက်လလောက် ရှိခဲ့ပြီ။ တစ်ယောက်နှင့်တစ်ယောက်တွေ့လျှင်လည်း ပြုံးမပြမိကြ။ ဘယ်သူကမျှ ကျွန်မတို့ကို မိတ်ဆက်မပေးခဲ့။ ကိုယ့်ဟာကိုယ် မိတ်ဆက်ရန်ထိလည်း တစ်ယောက်ကိုတစ်ယောက် စ်ိတ်မ၀င်စားခဲ့။

ဇန်န၀ါရီနံနက်ခင်းတစ်ခုမှာတော့ ကျွန်မအိမ်မှ ဟံသာဝတီအ၀ိုင်း ထိ ကျွန်မအပြေးကျင့်ရင်း သူနှင့်ဆုံတွေ့မိပါသည်။ ဆုံခဲ့မိတော့လည်း သူကိုယ့်ကိုမြင်သည်။ မျက်မှန်းတန်းမိနေသော ကောင်မလေးဟုသိသည်။ ကိုယ်က သူ့ကိုမြင်သည်။ ဒီကောင်လေးဟာ လမ်းထိပ်က ဗီဒီယိုခွေအငှားဆိုင်မှ ခဏ ခဏ မျက်မှန်းတန်းမိနေသော တစ်ယောက်ဟု သိသည်။ဒါပဲ။ သူက သူငယ်ချင်းတစ်ယောက်နှင့်အတူ အပြေးကျင့်နေသည်။ ကျွန်မက တစ်ယောက်တည်း၊ကျွန်မတို့ ပြုံးလည်း မပြမိကြပါ။

သူတို့နှစ်ယောက် စကားတပြောပြောနှင့် ပြေးနေတာမို့ ကျွန်မလောက် မမြန်ပါ။ ထို့ကြောင့် ကျွန်မကသူတို့ကို ကျော်တက်လာခဲ့သည်။အဲသည်မှာ အချစ်ရောက်လာဖို့ အခြေအနေကို ကြုံရသည်။

ကျွန်မ၏ ဝေါ့လ်ကင်းရှူးက လေးငါးနှစ်လောက် ဟောင်းနေပြီ၊ထိုပြင် ကျွန်မက ဖိနပ်ကြိုးချည်ရာတွင် အလွန်ညံ့ပါသည်။ကျွန်မဖိနပ်ကြိုးသည် တစ်ခါပြေးလျှင် အနည်းဆုံးတစ်ဖက်တစ်ခါတော့ ပြန်ပြင်ချည်ရတတ်၏။ ကြိုးပြေပြီး ကြိုးနှစ်ချောင်းလုံး ဘတ်လတ်ဘတ်လတ် ဒယဉ့်တိုက်နေသည်ကို ခဏခဏတွေ့ရတတ်ပါသည်။

အဲသည်မနက်က ကျွန်မသည် သူတို့နှစ်ယောက်ရှေ့မှာ ဖိနပ်ကြိုးပြေနေခဲ့သည်။ချည်ထားသည့် ကြိုးပြေလို့ဖြင့် ဖိနပ်က ချောင်လာစရာ အကြောင်းမရှိပါ။ ဟိုဘက်သည်ဘက် ရက်ယှက်ကာ တင်းတင်းဆွဲထားသော ကြက်ခြေခတ် နေရာတွေက နဂိုအတိုင်းပါပဲ။ သို့သော် ဖိနပ်ကြိုးပြေပြီး တန်းလန်းကျခြင်း၊ဖိနပ်ဟောင်း၍ ချောင်နေခြင်း နှစ်ခုပေါင်းလိုက်သောအခါ ကျွန်မ၏ ညာဘက်ခြေထောက်က လိုချင်ရာကို မရောက်ဘဲဖြစ်သွားသည်။ ထိုအချိန်မှာပဲ ကျွန်မလဲသွားပါသည်။

ပထမဆုံးသိလိုက်တာကတော့ ရှက်တာပါပဲ။ ရပ်ကွက်ထဲက ကောင်လေးတွေ့ရှေ့မှာတော့ အရှက်ကွဲပြီး နောက် သိလိုက်တာကတော့ ဒူးဆစ်ဆီက နာကျင်မှုပါပဲ။ဘောင်းဘီအရှည် ၀တ်ထားသဖြင့် ဒဏ်ရာကို မမြင်နိုင်သော်လည်း ပေကျံပွန်းသွားသော ဘောင်းဘီသားကို ကြည့်ပြီး ဒူးလည်းပွန်းသွားပြီဟု မှန်းလိုက်ရသည်။ ထို့ကြောင့် ကမန်းကတန်းထရပ်လိုက်ပါသည်။သူတို့ကကျွန်မဘေးမှ ကျော်တက်ရန် ပြင်နေပြီ။

``ဟေ့ …ဟေ့ …မင်းဖိနပ်ကြိုး ပြေနေတယ် ´´

သူ့သူငယ်ချင်းက ကျွန်မအား ဖိနပ်ကို လက်ညှိုးထိုးပြသည်။ကျွန်မသည် ထူပူနေသောမျက်နှာကို အောက်ငုံလိုက်ပြီး ကြိုးတပ်ရန် ကိုယ်ကို ကိုင်းငုံချလိုက်သည်။ အဲသည်ကျမှ လက်ဖနောင့်မှာ ပွန်းပြီး သွေးခြည်ဥနေတာကို မြင်ရသည်။ နီရဲနေတာပဲ၊သွေးဟုထင်လိုက်ချိန်မှာ ကျွန်မမူးပြီးထိုင်ကျသွားပြီး။

``ဟာ……..ဟေ့ကောင်၊ကောင်မလေး လဲသွားပြန်ပြီကွ´´

အဲဒါ သူ့အသံ။သူ့အသံသည် ဂစ်တာတစ်ခု၏ အပေါ်ဆုံး ကြိုးနှစ်ချောင်းတည်း တီးခတ်သည့်အသံလိုပဲ ကျွန်မအကြားအာရုံထဲသို့ လှိုင်းခတ်၍ ၀င်ရောက်သွားသည်။အသံပြီးတော့ လူကိုယ်တိုင် အနားသို့ရောက်လာသည်။

``နင့်လက်မှာ သွေးတွေနဲ့၊ နင့်မှာ လက်ကိုင်ပ၀ါ ပါလား´´

ကျွန်မမှာ ဘာမှ မပါပါ။ သူ့ကိုမော့ကြည့်သော်လည်း ပြာဝေသော မျက်လုံးကြောင့် သဲသဲကွဲကွဲ မမြင်ရ၊

``ဒါဖြင့် နင်ဘာကိုမှမကိုင်နဲ့၊ ဖိနပ်ကြိုးကိုလဲ မကိုင်နဲ့၊ငါချည်ပေးမယ်´´

သူ ကျွန်မအနားမှာ ထိုင်ချလိုက်သည်။ကျွန်မ၏ ဖိနပ်ကြိုးကို ချည်ပေးနိုင်ဖို့ လုံလောက်စွာ နီးကပ်သော အကွာအဝေးဖြစ်သည်။သူ့ရင်ဘတ်သည် ကျွန်မမျက်နှာနှင့် တစ်ပေလောက်ပဲ ဝေးကွာသည်။ထိုရင်ဘတ်ဆီမှ ရေမွှေးနံ့တစ်ခုနှင့် ချွေးနံ့ပေါင်းနေသော ကိုယ်နံ့ပြေပြေလေးတစ်ခုကို ရပါသည်။အဲဒီအနံ့သည် တုန်လှုပ်ရှက်ရွံစွှာ အသက်ပြင်းပြင်းရှိုက်ရှူနေရသော ကျွန်မ၏ အဆုတ်ထဲမှတစ်ဆင့် နှလုံးသားထဲ၊ ထိုမှတစ်ဆင့် သွေးကြောတွေထဲသို့ ပျံ့နှံ့စီးဝင်သွားခဲ့ပါသည်။ သူကျွန်မအသားကို မထိခဲ့ပါ၊ ကျွန်မ၏ ဝေါ့လ်ကင်းရှူးနှင့် ဖိနပ်ကြိုးကိုသာ သူထိခဲ့ပါသည်။ သို့သော် သူ့လက်မှ ပူနွေးမှုသည် ဖိနပ်ကြိုးထဲမှတစ်ဆင့်၊ခြေအိတ်မှတစ်ဆင့် ကျွန်မကိုယ်ခန္ဓာထဲသို့ ဖြည်းညင်းစွာ ၀င်ရောက်သွားခဲ့သည်။ အဲသည်အခါကျမှ ပြာဝေမှုသက်သာသွားသော မျက်လုံးများဖြင့် သူ့လက်ကို ကျွန်မကြည့်မိသည်။ကြီးမားသော၊သွယ်ရှည်သောလက်တွေ……..၊ဖိနပ်ကြိုးကို ဖျတ်လတ်သွက်လက်စွာ၊ထိုပြင် လှပစွာ ချည်ပြီးသွားသော လက်တွေ။

``ကဲ….ရပြီ၊နင်မူးနေသေးလား´´

ကျွန်မခေါင်းမညိတ်ရသေးမီ သူက စပို့ရှပ်အိတ်ထဲမှ ချိုချဉ်တစ်လုံး ထုတ်ပေးသည်။

``ရော့..ဒါကိုစားလိုက်၊ဒီနားမှာပဲ ထိုင်နေခဲ့၊ငါတို့ ပြန်လာမှ အတူလိုက်ပြန်…ဟုတ်ပြီလား´´

သူ့ချိုချဉ်သည် သာမန် အ၀ါရောင်ချိုချဉ်တစ်လုံးသာဖြစ်သည်။ ထုပ်ပိုးထားသည့် ပလတ်စတစ်စမှာလည်း အသည်းပုံတွေ ဘာတွေမပါ။သို့သော် သူ့အင်္ကျင်္ီအိတ်ကပ်ထဲက ချိုချဉ်၊သူ့နှလုံးသားနှင့် ထိကပ်စွာ ပူနွေးနေသော ချိုချဉ်၊ကျွန်မစားဖူးသမျှ ချိုချဉ်အားလုံးထဲတွင် သူ့ချိုချဉ်က အာဟာရအပြည့်ဆုံး၊အမူးအပြေဆုံး ဖြစ်ပါသည်။

အဲသည် ချိုချဉ်ခွံကလေး ယခုအချိန်ထိ ကျွန်မမှာ ရှိပါသည်။

*******************************************

သူ့ကို ကျွန်မက ``ကောက်ကောက်´´ဟု ချစ်စနိုးခေါ်ပါသည်။ဆံပင်လေးတွေ ဖွာကောက်နေတာကြောင့်၊ကျွန်မအပေါ် ခဏခဏ စိတ်ကောက်တတ်သောကြောင့်၊နောက်ပြီး သူ့နံမည်အရင်းကို ကျွန်မ မကြိုက်တာကြောင့် ဖြစ်ပါသည်။(သူ့ နာမည်က ခပ်တုံးတုံးနာမည်ဖြစ်သည်၊ သူ့မိဘတွေသည် ဒီလောက်ရင်ခုန်စရာကောင်းသည့် ၊ကြမ်းတမ်းသွက်လက်စွာ ခေတ်မီသည့်သားကို နည်းနည်းမျှ ရင်ခုန်ချင်စရာမကောင်းသည့် ခပ်တုံးတုံးနာမည်ကြီး ပေးမှပေးရက်လေခြင်း။)

သူ့မှာ စတိုင်ဘောင်းဘီ သုံးထည်၊ဂျင်းဘောင်းဘီနှစ်ထည်နှင့် ပုဆိုးသုံးထည် ရှိပါသည်။ အဲဒါတွေ အားလုံး သူရသည့်လခနှင့် ၀ယ်ထားခြင်းဖြစ်ပါသည်။ သူသည် အင်းစိန် စက်မှုသိပ္ပံမှဆင်းသော လျှပ်စစ်အင်ဂျင်နီယာပေါက်စလေး ဖြစ်ပြီး ဆောက်လုပ်ရေးကုမ္ပဏီ တစ်ခုမှာ အလုပ်လုပ်ပါသည်။ တနင်္ဂနွေနေ့လယ်တွေမှာပဲ အေးအေးဆေးဆေးတွေ့ရတတ်ပါသည်။ တစ်ခါတစ်ခါမှာတော့ ကျွန်မ အလုပ်လုပ်ရာ မိတ္တူဆိုင်သို့ သူလာပြီး စာ၇ွက်တွေ မိတ္တူကူးတတ်ပါသည်။ အဲသည်အခါမျိုးမှာ စက္ကန့်ပိုင်းလောက် စကားပြောရတတ်ပါသည်။ ထိုအချိန်များအား`ကျွန်မတို့အတွက် အပိုဆုကြေးလေးတွေ´ ဟုသူကခေါ်ပါသည်။

Bonus ဟူသောအသုံးအနှုန်းသည် အလုပ်ထဲမှ အသုံးအနှုန်းဖြစ်သော်လည်း ကျွန်မတို့အချစ်ထဲသို့ သူက ဆွဲယူလာတတ်သည်။ သူနှင့်ကျွန်မ လမ်းခွဲခါနီးတိုင်း `ငါ့ကို ဘောနပ်စ်လေးပေးခဲ့ပါဦးဟာ´ ဟု သူတောင်းတတ်သည်။ သူတောင်းဆိုသည့် အပိုဆုကြေးမှာ ငွေမဟုတ်ပါ၊ ထွေပြားဆန်းကြယ်သည့် နှုတ်ခမ်းတစ်ခုလည်း မဟုတ်ပါ။ ကျွန်မ၏လက်သန်းနှင့် သူ့လက်သန်း ချိတ်ယူကာ လက်သီးလေးတွေ ဆုပ်လျက် ကျွန်မ သူ့လက်ခုံကို လှစ်ခနဲနမ်းလိုက်သည့် နွေးထွေးမှုတစ်ခုသာ ဖြစ်တတ်သည်။ အဲဒါကို သူသည် မင်းသမီးလေး၏ ပန်းကုံးစွပ်ခံလိုက်ရသော လူဆင်းရဲကလေးတစ်ယောက်လိုပင် ကျေနပ်ကြည်နူးစွာ ခံယူတတ်ပါသည်။

တစ်ခါတစ်ခါ သူတောင်းသည့် အပိုဆုကြေးက ရယ်စရာကောင်း၏။

ကျွန်မကို သူက နှုတ်ခမ်းဆိုးဆေးတောင့် (ဈေးသိပ်မကြီးသည့်)တစ်ခု ၀ယ်ပေးပြီး သူ့ရှေ့မှာပဲ ဆိုးခိုင်းသည်၊နှုတ်ခမ်းဆိုးဆေး ဆိုးသည့်အခါ နှုတ်ခမ်းပေါ်မှာ အရောင်စွဲ၍ တင်ကျန်ရစ်စေရန် ကျွန်မက စက္ကူလက်ကိုင်ပ၀ါခေါက်လေးကို ငုံပြီး ဖိနှိပ်ပစ်လျက် နှစ်ထပ်သုံးထပ် ပြန်ဆိုးလေ့ရှိတာ သူသိထားသောကြောင့်ဖြစ်ပါသည်။သူ့နှုတ်ခမ်းနီကို သုံးကြိမ် စက္ကူဖြင့်ဖိပြီး လေးကြိမ်မြောက် ဆိုးပြီးသွားသည့်အခါ စက္ကူလက်ကိုင်ပ၀ါလေးပေါ်၌ နှုတ်ခမ်းရာသုံးခု ထင်နေခဲ့ပြီးပြီဖြစ်၏။ ထိုစက္ကူလက်ကိုင်ပ၀ါလေးကို သူက ကျွန်မဆီမှတောင်းယူပါသည်။

ပထမဆုံးအကြိမ် သူတောင်းတုန်းက ကျွန်မ မပေးချင်ခဲ့ပါ။

`ဟင်….ဘာလုပ်ဖို့လဲ´ ဟု ကျွန်မက မေးတော့ သူက ကျယ်ပြန့်စွာ ပြုံးရယ်လျက် `ဘာလုပ်လုပ်ပေါ့ ´ ဟု ဖြေခဲ့သည်။ ထို့နောက် ဘောနပ်စ်လေးအဖြစ် ပေးခဲ့ပါဟု သူပြော၏။ သူသည် အမြဲတမ်းတော့ အပိုဆုကြေး တောင်းတတ်သူမဟုတ်ပါ၊ ဒါကြောင့် ကျွန်မသူ့ကို စက္ကူလက်ကိုင်ပ၀ါလေး ပေးလိုက်ပါသည်။

ထို စက္ကူလက်ကိုင်ပ၀ါလေးကို ၇င်ဘတ်ပေါ်မှာတင်ပြီး အိပ်သည်ဟု နောက်ထပ်ဆုံမှ သူပြော၏။ နောက်ပြီး ကျွန်မမမေးဘဲနှင့် သူ့ဟာသူ မလုံမလဲနှင့် `အင်းလေ…ရင်ဘတ်ပေါ်တင်ပြီး အိပ်ရုံတော့လဲ မကဘူးပေါ့ဟာ´ ဟု ခပ်မှုန်မှုန်ပြုံးလျက် ဖွင့်ဟ၀န်ခံပါသည်။

***************************************

ကျွန်မနှင့် သူသည် တစ်ယောက်ကိုတစ်ယောက် ချုပ်ချယ်မှုတွေ တောင်းဆိုမှုတွေ ဘာတစ်ခုမှ မပြုလုပ်ကြပါ၊ သူစီးကရက်သောက်တတ်တာကို ကျွန်မ မြင်ဖူးပါသည်။ စီးကရက်ကို ကျွန်မမကြိုက်ပါ။ သူသောက်နေတာကိုလည်း မကြိုက်ပါ။ သို့သော် ကျွန်မ သူ့အား ဘာမှမတောင်းဆိုခဲ့ပါ။ စကားပြောရင်း အဆင်မပြေဖြစ်လို့ စိတ်တိုစိတ်ကောက်ရတာတွေလောက်ပဲ တစ်ယောက်ကိုတစ်ယောက် ခွင့်ပြုထားခဲ့ကြသည်။

သူနှင့် ကျွန်မ အစကတည်းက အပေးအယူတစ်ခု လုပ်ထားကြသောကြောင့် ဖြစ်ပါသည်။

`နင့် ဘ၀ထဲကို ငါ့ကိုဆွဲမခေါ်နဲ့၊ငါလဲ နင့်ကို ငါ့ဘ၀ထဲ ဆွဲမခေါ်ဘူး၊ နင်သဘောတူလား။သဘောတူရင် နင်အလုပ်ပြန်တဲ့အချိန်ထိ ငါစောင့်ပြီး အိမ်ပြန်ပေးမယ်´

`သဘောတူတယ်။နင်လဲ ငါ့ကို ဟိုဟာမလုပ်နဲ့ ဒီဟာမလုပ်နဲ့ မချုပ်ချယ်နဲ့´

`အေး မချုပ်ချယ်ဘူး´

ူ့ရုံးက လမ်း ၅၀မှာ ၊ကျွန်မဆိုင်က ဆိပ်ကမ်းသာလမ်းမှာ၊သူ့ရုံးက ခုနှစ်နာရီမှာ ဆင်းသည်။ထိုအခါ သူကရုံးဆင်းလျှင် ကျွန်မဆိုင်နားက လက်ဖက်ရည်ဆိုင်မှာ တစ်နာရီတိတိ ထိုင်စောင့်ပြီး အပြန်ကိုစောင့်၍ ဘတ်စ်ကား အတူစီးကြပါသည်။

သူက မောင်နှမသုံးယောက်တွင် အကြီးဆုံး။လခနှစ်သောင်းကျပ် ရသည်ကို မိဘအား တစ်သောင်းခွဲအပ်သည်ဟု သူပြောပါသည်။

ကျွန်မတို့သည် ဘတ်စ်ကား ကျပ်ညပ်နေလျှင် တစ်ယောက်ကိုတစ်ယောက် စကားပင်မပြောနိုင်အောင် စိတ်ညစ်နေကြသည်။ ဘတ်စ်ကား ချောင်လျှင်တော့ စကားပြောကြပါသည်။ သူကြည့်ပြီးသည့် ရုပ်ရှင်များအကြောင်း၊သူဖတ်သည့် မဂ္ဂဇင်းများအကြောင်းလည်းပါသည်။ သူ့ညီလေး ခွေးကိုက်ခံရလို့ ခွေးရူးကာကွယ်ဆေးသွားထိုး ရသည့်အကြောင်း၊သူ့အမေသွားကိုက်လို့ သွားဆရာဝန် သွားပြသည့်အကြောင်း စသည်စသည် မိသားစု အရေးတွေလည်းပါသည်။ ကျွန်မ၏ထီးကလေး နွမ်းနေပြီဖြစ်၍ ထီးအသစ်ကလေး ၀ယ်ပေးချင်ကြောင်းလည်းပါသည်။ကျွန်မကလည်း ကျွန်မတို့မောင်နှမတွေ တရုတ်ကားနှင့်ဘောလုံးပွဲ လုပြီး ရန်ဖြစ်ကြသည့်အကြောင်း၊မနက်စောစော အမေမနိုးသဖြင့် ကျွန်မ ဟင်းထချက်တာ ဟင်းအိုးတူးသွားသည့်အကြောင်း ရုပ်မြင်သံကြားမှ ကြော်ငြာအသစ်တွေအကြောင်း ပြောပြတတ်ပါသည်။ သူ့ကျောပိုးအိတ် ကလေးနွမ်းစုတ်နေသဖြင့် ကျောပိုးအိတ်သစ်ကလေးတစ်ခု ၀ယ်ပေးချင်လို့ တစ်လမှာ နှစ်ရာကျပ် စုထားသည့်အကြောင်း ပြောပြနေတတ်ပါသည်။

သို့သော် ကျွန်မတို့ ပြောသည့်အကြောင်းများတွင် အချစ်အကြောင်း မပါဝင်ခဲ့၊ယောင်္ကျားနှင့်မိန်းမတို့၏ လိုအင်ဆန္ဒများ မပါဝင်ခဲ့၊မာနတွေ၊မခံချင်စိတ်တွေ မပါဝင်ခဲ့။

ကျွန်မဘေးမှာ သူထိုင်နေလျှင် ကျွန်မ၏ ညအိမ်အပြန်ခရီး လုံခြုံချောမွေ့နေသည် ဟု ခံစားရသည်။သူ့ဆံပင် ဖွာဖွာလိမ်လိမ်လေးတွေက ကျွန်မနဖူးမှာ နားရွက်မှာ လာထိလျှင်၊သူ့လက်မောင်းနှင့်ကျွန်မပခုံးထင်မိလျှင် နွေးထွေးသော ချိုမြိန်မှုကို ကျွန်မခံစားရသည်။ တစ်ခါတစ်ခါ သူမရိပ်မိအောင် သူ့လက်မောင်းမှာ တစ်စက္ကန့် နှစ်စက္ကန့်လောက် ပါးအပ်ပြီး အသက်ပြင်းပြင်း ရှိုက်ရှူလိုက်ရလျှင် သူ့ နှလုံးသွေးတွေက ကျွန်မကိုယ်ထဲသို့ ပေါင်းစီးစီးဝင်သွားသလို အချစ်အရသာကို ကျွန်မ ကျေနပ်စွာ ရလိုက်သည်။

ကျွန်မ သူ့ကို စကားပြောရင်း တစ်ခါတစ်ခါ စကားဖြတ်လျက် သူ့ကို ငေးမောမိသွား၏။ သူ့က `ဘာကြည့်တာလဲ´ဟု မေးတတ်ပါသည်။

`နင်ကလေ…တစ်ခါတစ်ခါကျတော့………..´ကျွန်မပြောချင်သည့် စကားကိုမပြောတော့ဘဲ ဘာမှမဟုတ်ပါဘူးဟု ရယ်ပစ်လိုက်လျှင် `သိပ်ချစ်စရာကောင်းတာပဲ လို့ပြောမလို့မဟုတ်လား´ဟု သေချာသောအပြုံးမျိုးဖြင့် စတတ်၏။ `ဟုတ်ပါဘူး၊သိပ်ရုပ်ဆိုးတာပဲလို့ ပြောမလို့´ ဟု ကျွန်မက ဖြေလျှင် သူရယ်မောပါသည်။ `မယုံပါဘူး´ တဲ့

***********************************************************

ဒါကို အချစ်မဟုတ်ဘူးဟု တချို့က ဝေဖန်ချင် ဝေဖန်ပါလိမ့် မည်။

အချစ်ဆိုတာ ဘာလဲဟု အတိအကျအဓိပ္ပာယ် ဖော်နိုင်သူတွေကို ကျွန်မတကယ် ချီးကျူးပါသည်။ကျွန်မကတော့ အချစ်ဆိုတာကို အဓိပ္ပာယ်အတိအကျ မသိပါ။

အချစ်ဆိုတာ ပိုင်ဆိုင်ရယူလိုခြင်းလား၊ စွန်လွတ်ခြင်းလား၊ အချစ်ဆိုတာ ရင်ခုန်စွာတက်မက်ခြင်းလား ၊ စားသုံးပြီးသော်လည်း မ၀သည့် ချိုမြိန်သော ပျားရည်စက်တွေလား၊နက်ရှိုင်းစွာ တိုးဝင်ဖိှု့ ဆွဲဆောင်သည့် မွှေးပျံသော အမှောင်ထုတစ်ခုလား၊ နေပူထဲကလာသူကို အရိပ်ထဲမှ ကြိုဆို၍ တိုက်သောအေးစိမ့်သည့် ရေတစ်ခွက်လား။

အဲဒါတွေ ကျွန်မ မပြောတတ်ပါ။

ကျွန်မသိသည်က ကျွန်မ၏ အချစ်ကတော့ နူးညံ့ပျော့ပျောင်းသည့် ခွေလိမ်ဖွာလွှင့်သာ အညိုရင့်ရင့် ဆံပင်လေးများဖြစ်သည်။ ဟမ်ဘာဂါ၏ သုံးပုံတစ်ပုံလောက် ကို အလွယ်တကူ ငုံပြီး ကိုက်ယူနိုင်လောက်အောင် ကျယ်ပြန့်သော ပါးလှပ်သော နှုတ်ခမ်းတစ်စုံ ဖြစ်သည်။ အဲဗား ရေမွှေးနံ့နှင့် ချွေးနံ့ပေါင်းစပ်ပြီး ချိုမြ မွှေးသည့် ရှပ်အင်္ကျီ အိတ်ကပ်တစ်ခုဖြစ်သည်။ ပူနွေးစွာ မြဲမြံသည့် လက်ဖ၀ါးတစ်စုံဖြစ်သည်။ ဂစ်တာဘေ့စ်သံလို ခိုင်မာစွာ ဆွဲဆောင်သည့် ၀ါညက်ညက် အက်သည့်အသံတစ်ခု ဖြစ်သည်။

အဲသည့် အချစ်ကို ကျွန်မ ခံစားသိဖြင့် သိနေပါသည်။

ဒါကြောင့် အဲဒါ အချစ်ပဲ ဖြစ်သည်။

အချစ်တစ်ခု၏ ရည်မှန်းချက်သည် လက်ထပ်ခြင်းဟု ပြောလျှင် အဲသည့်စကားကို ကျွန်မလက်မခံပါ။ လက်ထပ်ခြင်းသည် အချစ်၏ သင်္ချိုင်းဖြစ်ချင်ဖြစ်မည်။ သို့မဟုတ် အချစ်၏ အဆုံးသတ် ဇာတ်သိမ်း တစ်ခုဖြစ်ချင်ဖြစ်မည်။ အချစ် ၏ ခရီးဆုံးပန်းတိုင် ဖြစ်ချင်ဖြစ်မည်.။ လက်ထပ်ခြင်းသည် ဘာပဲဖြစ်ဖြစ် ကျွန်မအတွက်တော့ မှုန်ဝါးဝါး ဝေးကွာလှသည့် ပန်းချီကားတစ်ချပ်ဖြစ်သည်။ ကျွန်မ စိတ်မ၀င်စားပါ။ ကျွန်မ စိတ်ဝင်စားအောင်မဆွဲဆောင်နိုင်ခဲ့ပါ။

အချစ်တွင် တာဝန်ယူမှု၊ကတိပြုမှုပါသလား၊ မပါပါ၊

အချစ်တွင် အချစ်ပဲ ပါပါသည်။လိုက်လျှောမှုပါဝင်သော်လည်း အဲဒါဟာ တာဝန်ကြောင့်လိုက်လျှောတာမဟုတ်၊

အချစ်စိတ်သက်သက်ဖြင့် လိုက်လျောတာဖြစ်သည်။ မြတ်နိုးခြင်းသက်သက်ဖြင့် လိုက်လျောတာဖြစ်သည်။ စောင့်ရှောက်မှုပါဝင်သော်လည်း အဲဒါဟာ တာဝန်ကြောင့် ဂတိကြောင့် စောင့်ရှောက်တာမဟုတ်၊အချစ်စိတ်သက်သက်ကြောင့် ယုယစိတ်သက်သက်ကြောင့် စောင့်ရှောက်တာပဲ ဖြစ်သည်။

အချစ်သည် နွားနို့တစ်ခုမဟုတ်၍ သိုးသွားမှာချဉ်သွားမှာကို မစိုးရိမ်ရပါ၊ အချစ်ယောင်ဆောင်ထားသည့် မက်မောတွယ်တာမှုတွေကတော့ အချိန်လွန်လျှင် သိုးကုန်နိုင်ပါလိမ့်မည်။

ကျွန်မနှင့်သူ၏ အချစ်သည် ဘာနှင့်မှ ရောမနေသောအချစ်သက်သက်ဖြစ်သည်။ထို့ကြောင့် ကျွန်မတို့ ဘာမှ ထပ်မလိုအပ်တော့ပါ၊ ကျွန်မတို့မှာရှိသော အချစ်သည် တစ်ယောက်ကိုတစ်ယောက် ပေးလို့ယူလို့လည်းမရ၊

တစ်ယောက်ကိုတစ်ယောက် ခံစားလို့သာရပါသည်။ နီးလည်းသိပ်နီးမလာခဲ့ ထိုကြောင့် သိပ်ဝေးသွားမှာကိုလည်း မပူပင်ခဲ့ပါ။

သူကကျွန်မကို `ဘာလိုချင်လဲ´ ဟု ခဏခဏမေးဖူးပါသည်။ လခကောင်းတဲ့အလုပ်တစ်ခု ရချင်သည် ဟု ကျွန်မဖြေတတ်ပါသည်။

`နင်ရော ဘာလိုချင်လဲ´ ဟု သူ့ကို ပြန်မေးပါသည်။

`နင့်ကိုအလုပ်သွား အလုပ်ပြန်ဝင်ခေါ်ပေးဖို့ ကားလေးတစ်စီး လိုချင်တယ်´ဟုသူဖြေပါသည်။

`ငါတို့တွေ မနက်စောစော လမ်းမလျှောက်ရတာကြာပြီနော်´ ဟု သူကပြောတော့

`အခု မိုးကုန်တော့မှာပဲ ဆောင်းရောက်ရင် ငါတို့ လမ်းလျှောက်၊ပြေးကြမယ်လေ´ ဟု သူ့ကိုပြောမိပါသည်။

ကျပ်ညပ်နေသော ဘတ်စ်ကားပေါ်မှာမဟုတ်၊ ဆူညံနေသော လက်ဖက်ရည်ဆိုင်ထဲမှာမဟုတ်၊ ညအမှောင်မှာ ကသုတ်ကရက် အိမ်ပြန်ရသော လမ်းမှာမဟုတ် ၊နှင်းဖြင့်အေးစိမ့်သော ခြောက်သွေ့သော လတ်ဆတ်သော နံနက်ခင်းတစ်ခုမှာ အေးအေးဆေးဆေး တွေ့ချင်သည်။ တစ်ယောက်ကိုတစ်ယောက် လက်ချင်းထွေးဆုပ် ပြီးပြေးချင်သည်။ ဘိနပ်ကြိုးချည်ပေးရင်း တစ်ယောက်မျက်နှာတစ်ယောက် ငေးမောချင်သည်။ အချစ်အတွက် မျှော်လင့်ချက်တစ်ခုခု ရှိရမည်ဆိုလျှင်

``ကျွန်မမျှော်လင့်တာက ဆောင်းနံနက်ခင်း´´တွေဖြစ်ပါသည်။

ဂျူး


မအားလပ်တဲ့အချိန်တွေမှာ လာလည်သောသူငယ်ချင်းများအတွက် ကျွန်တော်နှစ်သက်သောဂျူးရဲ့ ၀တ္တုလေး ကိုဝေငှလိုက်ပါတယ်။

2 comments:

    ဒီဝတ္တုလေးကို ဖတ်ပီး လူကို ငိုင်ကျသွားတယ်ပဲဗျာ။ တော်တော်ကောင်းတယ်။ ဒါက အပြည့်လားဗျ။ရှိရင်တင်ပေးပါဦးဗျာ။

     

    Very nice love story..

     

Blogger Templates by Blog Forum

 
လာလည်သူအပေါင်းကိ်ုကျေးဇူးတင်ပါသည်။